ياثورتي ثُوري على الجماعهْ
شَلُّوا الزلط واتقاسموا البضاعهْ
قُلنا اسمعوا .. إحنا صنعنا الثورهْ
قالوا و مِنّا السمع ثم الطاعهْ
قُلنا فأين الأمن؟ .. ليش اتنحطلْ؟!
قالوا السبب عفّاش هُوْ واتباعهْ
قلنا وأين النفط ؟ أو قد كمَّلْ ؟!
قالوا لنا عفّاش هو ذي باعهْ
عفّاش يا خُبره خلاص قد طربَلْ
لا تفعلوا عفّاش ذا فزَّاعهْ
إحنا معاكم .. بعدكم .. بس لكنْ
مَحناش صُغار نبزي من الرضَّاعهْ
نشتي عمل يبني لنا مُستقبلْ
كم بانعلّق فوق ذِيْ الشمَّاعهْ ؟!
زاد الفَسَاد ياخُبرتي والريحهْ
فاحت علينا مثلما البلّاعهْ
قالوا اصبروا ياناس نِشتي فُرصهْ
ماشي طبيب يفحص بلا سمّاعهْ
قلنا لهم إلى متى بانصبرْ؟
قالوا اصبروا لمّا تقوم الساعهْ
******************
هم يركبوا واحنا لهم بوابيرْ
إحنا خشب وهم لنا مساميرْ
لو يرقصوا تُصفّق الجماهيرْ
لو زمَّروا نرقُص على المزاميرْ
لقُوفهم تصرف لنا خبابيرْ
وبالعقول هم يلعبوا فتاتيرْ
*****************
باسندوه .. أرجوك لا تتعصبْ
الكُل يدري من هو المُتسبِبْ
هادي .. صميل العدل عز المطلبْ
لا يفجعك هذا و ذاك يتقرَّبْ
خليك أسدْ .. واجه وما تتهربْ
عُمر الأسد ماخاف يوم من أرنبْ
سُدّوا مع (الشيطان) بس .. يتأدبْ
ولا يساومنا ولا يتقلعبْ
حتى أنا و ام العيال سدّيناْ
معْ إنيْ شيباني وهِيْ من شرجبْ
أهم شي حُب الوطن يتغلَّبْ
على مصالِحنا و ننسى المكسبْ
وعيب علينا اليوم نرضَىْ القسمهْ
هذا وطن ياناس ماهُوش حبحبْ
======================
وللأحرار فقط تحياتي .. طارق الشيباني
